काठमाडौं : काठमाडौंको कीर्तिपुर नगरपालिकास्थित चोभारमा आगलागी भएको छ । मंगलबार बिहान कवाडी संकलन केन्द्रमा आगलागी भएको हो ।
कवाडी संकलन केन्द्र र बंगुरपालन गरिएको ठाउँमा आगलागी भएको र अझै आगो नियन्त्रणमा लिन नसकिएको काठमाडौं महानगरपालिकाका सहायक निरीक्षक वसन्तकुमार श्रेष्ठले बताउनु भयो । आगलागीको जानकारी हुनेबित्तिकै महानगरको टोली पुगेर नियन्त्रणमा लिने प्रयास गरिरहेको उँहाले जानकारी दिनु भयो ।
आगलागी भएको स्थानमा जस्तापाताका टहरा बढी भएका कारण नियन्त्रणमा लिन नसकिएको उँहाले बताउनु भयो । स्काभेटर मगाएर जस्तापाता हटाउने र आगो नियन्त्रणमा लिने प्रयास गरिरहेको उँहाले जानकारी दिनु भयो ।
नेपाल प्रहरी, सशस्त्र प्रहरी, स्थानीय बासिन्दा लगायत मानिस र निकाय मिलेर आगो निभाउने प्रयास भइरहेको छ ।
