दीपेन्द्रको अर्धशतकमा विराटनगरविरुद्ध सुदूरपश्चिमले दियो प्रतियोगिताकै उच्च लक्ष्य
कप्तान दीपेन्द्रसिंह ऐरीको अर्धशतकप्रेरित सुदूरपश्चिम रोयल्सले नेपाल प्रिमियर लिग (एनपीएल)मा विराटनगर किंग्सविरुद्ध १८३ रनको लक्ष्य प्रस्तुत गरेको छ ।
मंगलबार कीर्तिपुरस्थित त्रिवि क्रिकेट मैदानमा टस हारेर ब्याटिङमा उत्रिएको सुदूरपश्चिमले निर्धारित २० ओभरमा सात विकेट गुमाएर १८२ रन बनायो ।
जारी प्रतियोगितामा यो सबैभन्दा ठूलो योगफल हो । यसअघि, सोमबारको खेलमा कर्णाली याक्सले जनकपुर बोल्ट्सविरुद्ध १४१ रन बनाउनु नै ठूलो योगफल थियो ।
सुदूरपश्चिमका कप्तान दीपेन्द्रसिंह ऐरीले ५७ रन बनाए । आक्रामक रूपमा प्रस्तुत भएका उनले २४ बलमा तीन चौका र पाँच छक्का प्रहार गरे । योसँगै दीपेन्द्र जारी प्रतियोगितामा अर्धशतक बनाउने चौथो ब्याटर बने । यसअघि, जनकपुरका दुई ब्याटर लहिरू मिलान्था र अनिल साहसँगै विराटनगरका मार्टिन गप्टिलले अर्धशतक बनाएका थिए ।
सुदूरपश्चिमका कप्तान दीपेन्द्रसिंह ऐरीले ५७ रन बनाए । आक्रामक रूपमा प्रस्तुत भएका उनले २४ बलमा तीन चौका र पाँच छक्का प्रहार गरे । योसँगै दीपेन्द्र जारी प्रतियोगितामा अर्धशतक बनाउने चौथो ब्याटर बने । यसअघि, जनकपुरका दुई ब्याटर लहिरू मिलान्था र अनिल साहसँगै विराटनगरका मार्टिन गप्टिलले अर्धशतक बनाएका थिए ।
८९–५ को स्थितिमा ब्याटिङमा आएका दीपेन्द्रले छैटौँ विकेटका निम्ति इशान पाण्डेसँग २५ बलमा ४९ रनको साझेदारी गर्दै सुदूरपश्चिमको इनिङ सम्हालेका थिए । १७औँ ओभरको पाँचौँ बलमा आउट हुुनुअघि इशानले १६ बलमा दुई चौका र एक छक्कासहित २१ रन बनाए । इशानलाई विराटनगरका विकेटकिपर लोकेश बमले रनआउट गरे ।
सुदूरपश्चिमले पहिलो इनिङको अन्तिम ६ ओभरमा ८५ रन बनाएको थियो । खेलको १४ ओभरसम्म सुदूरपश्चिमले पाँच विकेट गुमाएर ९७ रन बनाएको थियो ।
सुदूरपश्चिमका ब्रान्डन म्याकमुलमले ३६ रन जोडे । १३औँ ओभरको चौथो बलमा आउट भएका उनले २६ बलमा दुई चौका र दुई छक्का प्रहार गरे । म्याकमुलमलाई अनिल खरेलले प्रतिश जिसीबाट क्याच गराउँदै पभेलियनको दिशा देखाएका थिए ।
ओपनर विनोद भण्डारीले २३ रन बनाए । अनिल खरेलले गरेको पाँचौँ ओभरको चौथो बलमा प्रतिश जिसीबाट क्याच हुनुअघि उनले २० बलमा चार चौका प्रहार गरे । सैफ जैबले १४ रन थपे । ११औँ ओभरको तेस्रो बलमा बोल्ड भएका जैबले १५ बलमा एक छक्कासहित १४ रन बनाए ।
१९औँ ओभरको तेस्रो बलमा आउट भएका स्कट कुगलेनले ६ बलमा दुई चौका प्रहार गर्दै १० रन जोडे । उनलाई विराटनगरका क्रिस सोलले निकोलस किर्टोनबाट क्याच गराएका थिए ।
यसबाहेक आरिफ सेखले पाँच बलमा दुई चौकासहित नौ रन बनाए । ओपनर अमित श्रेष्ठले एक रन थपे ।
विराटनगरका अनिल खरेलले तीन विकेट लिए । चार ओभर बलिङ गरेका अनिलले २६ रन खर्चिए । क्रिस सोल, इस्मत आलम र बसिर अहमेदले समान एक विकेट लिए । विराटनगरका कप्तान सन्दीप लामिछाने विकेटविहीन रहे । चार ओभर बलिङ गर्दा उनले ३१ रन खर्चिए ।
प्रतियोगितामा सुदूरपश्चिको यो पहिलो खेल हो । विराटनगरको भने दोस्रो खेल हो । विराटनगर यसअघि पहिलो खेलमा जनकपुर बोल्ट्ससँग आठ विकेटले पराजित भएको थियो ।
