सिन्धुलीमा तरकारी बोक्ने बोलेरो दुर्घटना हुँदा तीन जनाको मृत्यु भएको छ, ११ जना घाइते भएका छन् । बीपी राजमार्गअन्तर्गतको सिन्धुलीमाढी–खुर्कोट खण्ड अन्तर्गत कमलामाई नगरपालिका २ चियाबारी नजिकै बा २० च ८२८३ नम्बरको बोलेरो दुर्घटना हुँदा गोलन्जोर गाउँपालिकाका वडासदस्य सहित तीनजनाको मृत्यु भएको हो ।
दुर्घटनामा परि गोलन्जोर गाउँपालिका ६ का वडा सदस्य ४५ वर्षिय उदय मश्राङ्गी मगर, ४२ वर्षिय पृथ्वी भुजेल र ३५ वर्षिय पवन मश्राङ्गी मगरको उपचारको क्रममा मृत्यु भएको जिल्ला प्रहरी कार्यालय सिन्धुलीका प्रहरी निरिक्षक केशव कुमार कटवालले जानकारी दिनुभयो ।
गोलन्जोर–६ को नाकाजोलीबाट सदरमुकामस्थित सिन्धुलीमाढीमा तरकारी तथा खाद्यान ओसारपसार गर्ने गाडी दुर्घटनामा परेको हो ।
प्रहरी निरिक्षक कटवालका अनुसार घाइतेमध्ये चार जनालाई थप उपचारका लागि धुलिखेल अस्पताल पठाइएको जिल्ला प्रहरी कार्यालय सिन्धुलीले जनाएको छ । यस्तै अन्यको सिन्धुली अस्पतालमै उपचार भैरहेको छ ।
