राष्ट्रिय परिचयपत्र तथा पञ्जीकरण विभागले बैशाख १ देखि व्यक्तिगत घटना दर्ता सप्ताह मनाइरहेको छ । ७ गते सम्म व्यक्तिगत घटना दर्ता सप्ताह मनाउदैछ । व्यक्तिका व्यक्तिगत घटनाहरु तोकिएको समय अर्थात घटना भएको ३५ दिन भित्र अनिवार्य रुपमा दर्ता गराउनुपर्छ भन्ने सन्देश आम जनमानसमा पुर्याउन सप्ताह मनाउन लागिएको हो ।
विभागले पत्रकार सम्मेलन गरी सन् २०२४ को अन्त्य सम्ममा सत् प्रतिशत व्यक्तिगत घटना दर्ता ( जन्म, मृत्यु, विवाह, बसाइँ सराइ, तथा सम्बन्ध विच्छेद) गराउने लक्ष्य राखेकाले सबैलाई सबैखालका घटना दर्ता समयमै गराउन आग्रह गरेको छ ।
व्यक्तिगत घटना दर्ताको प्रमाणपत्र बालबालिकालाई विध्यालयमा भर्ना गर्न, नागरिकता र पासपोर्ट बनाउन, नाबालक परिचयपत्र बनाउन, बैंक खाता खोल्न, नाता कायम गर्न, जीवन विमा गर्न साथै विभिन्न सरकारी सेवा, सुविधा तथा हक स्थापना गर्न आवश्यक पर्छ ।
जुन बेलामा आफूलाई चाहिन्छ त्यहि बेलामा घटना दर्ता गर्दा राज्यसंग अभिलेख नहुने र अभिलेखका अभावमा राज्यले दिने सेवा सुविधाको बाडफाड, बजेट विनियोजन, नीति निर्माणमा समस्या देखिने गरेको छ । यहि अन्योलता राज्यले बेहोर्नु नपरोस भनि समयमा नै घटना दर्ता आवश्यक रहेको विभागमा महानिर्देशक युवराज कटेलले बताउनुभयो । उहाँका अनुसार राज्यले प्रदान गर्ने सेवा सुविधा विस्तार, नीति निर्माणका साथै दोहोरोपनालाई हटाउन पनि घटना दर्ता आवश्यक छ ।
विभागका निर्देशक दिल कुमार तामाङले घटना दर्ताको महत्व सबैलाई बुझाउन ७५३ स्थानीय तहका ६६९१ वडा कार्यलयबाट काम भैरहेको जानकारी दिनुभयो । विभागका अनुसार हालै १५ देशका नेपाली नियोगबाट पनि घटना दर्ता सेवा दिइरहेको छ ।
