काठमाडौँ । महानगरपालिकाका मेयर र उपमेयर पदका उम्मेदवार छान्न नेपाली कांग्रेसको केन्द्रीय कार्यसम्पादन समितिको बैठक बस्दैछ । सभापति एवम् प्रधानमन्त्री शेरबहादुर देउवाले बिहीबारदेखि उम्मेदवारबारे छलफल थालेपनि अहिलेसम्म कुनै निष्कर्ष निस्किएको छैन ।
शनिबार राति करिब १० बजेसम्मै नेताहरूबीच छलफल भएपनि सहमति नभएको हो । सहमहामन्त्री जीवन परियारले सानेपास्थित केन्द्रीय कार्यालयमा बिहान ९ बजेपछि उम्मेदवारबारे छलफल गर्न बैठक बस्न लागेको जानकारी दिए । ‘छलफल भइरहेको छ, तर कुनै सहमति भएको छैन,’ उनले भने, ‘आजको बैठकले टुंगो लगाउने तयारी छ ।’
कांग्रेसले स्थानीय तह निर्वाचनका लागि आइतबारै घोषणा पत्र सार्वजनिक गर्ने कार्यक्रम राखेको छ । दिउँसो १ बजे सानेपास्थित कार्यालयबाटै घोषणा पत्र सार्वजनिक गर्न लागिएको समेत कांग्रेसले जनाएको छ ।
आइतबार देशभरि बिहान १० बजेबाट उम्मेदवारको मनोनयन दर्ताको कार्यक्रम छ । नेताहरूले महानगरपालिकाको मेयर र उपमेयर पदका उम्मेदवार नै छानेका छैनन् ।
