काठमाडौं । कोभ्याक्स सुविधा अन्तर्गत कोरोना भाइरस विरुद्धको थप ८ लाख मात्रा फाइजर खोप आज नेपाल ल्याइँदै छ । स्वास्थ्य सेवा विभाग व्यवस्थापन महाशाखाका अनुसार आज दोस्रो चरणको थप ८ लाख फाइजर खोप नेपाल ल्याउन लागिएको हो ।
अमेरिकी सरकारले कोभ्याक्स अन्तर्गत ९२ लाख डोज दिने घोषणा अनुसार पहिलो चरणमा गत शुक्रवार ७ लाख ६१ हजार मात्रा फाइजर खोप नेपाल ल्याइएको थियो । आउने फाइजर खोप १२ वर्षभन्दा माथि उमेरका बालबालिकालाई पहिलो र दोस्रो मात्रा दिइनेछ ।
यसैबीच, सरकारले कोरोना भाइरस विरुद्धको खोप लगाउनबाट छुटेकाहरूलाई खोप कार्यक्रममा सहभागी हुन अपिल गरेको छ । स्वास्थ्य तथा जनसङ्ख्या मन्त्रालयले नियमित पत्रकार सम्मेलनको क्रममा खोप लगाउन छुटेकाहरूलाई कार्यक्रममा सहभागी हुन अपिल गरेको हो ।