काठमाडौं। सत्तारुढ दल नेपाली कांग्रेसले अमेरिकी सहयोग सम्झौता एमसीसी अनुमोदन भएपछि पत्रकार सम्मेलन गर्दै राष्ट्रवादको नाममा भ्रमको खेती गर्नेहरूको काम बन्द भएको बताएको छ । पार्टी प्रवक्ता डा. प्रकाश शरण महतले पत्रकार सम्मेलन मार्फत पार्टीको आधिकारीक धारणा सार्वजनिक गरेका हुन् ।
“जुन स्प्रिटमा संसद्बाट एमसीसी पास गरेउ त्यही स्प्रिटमा लागु हुनेछ । नेपालको संविधान कानुनअनुसार यो सम्पन्न हुनेछ,” महतले भने, “व्याख्यात्मक घोषणामा हाम्रो बुझाइ र परियोजनामा समानता छ । यो आयोजना अघि बढ्नेमा सुनिश्चितत भएको छ । समयमा आयोजना सम्पन्न गर्न ध्यान जानुछ जसले सबै भ्रम पनि चिर्नेछ र नयाँ दातृ निकायमा पनि नयाँ अध्याय सुरु हुनेछ ।”
उनले एमसीसी संसद्बाट पारित भएसँगै राष्ट्रवादको नाममा भ्रमको खेती गर्नेहरूको काम बन्द भएको पनि बताए । “अफवाह, भ्रम र द्विविधा चिर्दै संसद्ले एमसीसी सहयोग अन्तर्गत आर्थिक सहायता अनुमोदन गर्यो । प्रतिपक्षि दलबाट पनि सहयोग प्राप्त भएको बुझेका छौँ,” महतले भने, “प्रधानमन्त्री शेरबहादुर देउवाको परिपक्क निर्णय र धैर्यताले यो सम्झौता अनुमोदन गर्ने आधार तय भएको हो ।”
प्रवक्ता महतले सत्ता गठबन्धन दल आगामी निर्वाचन सम्म कायम रहने समेत ठोकुवा गरे ।
