काठमाडाै । सहिद स्मारक ‘ए’ डिभिजन लिग फुटबलमा संकटा क्लबले विभागीय टिम नेपाल पुलिस क्लबलाई पराजित गरेको छ । त्रिपुरेश्वरस्थित दशरथ रंगशालामा आज भएको खेलमा संकटाले पुलिसलाई १–० गोल अन्तरले पराजित गरेको हो ।
संकटालाई जित दिलाउन निरज बस्नेतले निर्णायक गोल गरे । निरजले खेलको १८ औं मिनेटमा गोल गरेका हुन् । लक्ष्मण रुचालको कर्नरमा उनले डाइभिङ हेडमार्फत सुन्दर गोल गरे । यस जितसँगै संकटा ४ खेलमा ८ अंक जोड्दै लिगको चौंथो स्थानमा उक्लिएको छ । पुलिसको भने यो पहिलो हार हो ।
पुलिसले ४ खेलमा ५ अंक जोड्दै लिगको आठौं स्थानमा झरेको छ । खेलमा संकटाका निरज म्यान अफ दि म्याच तथा संकटाकै रोशन पहारी इमर्जिङ प्लेयर चुनिएका छन ।
